تجربتى مع مجموعة فيت مى من ميبليبن fit me maybelline

السلام عليكم ورحمة الله وبركاته

سبحان الله وبحمد سبحان الله العظيم

وعودة لمدونتى ,, اعترف انى مقصرة جدا جدا بس احيانا مش بيبقى عندى طاقة للكتابة او التصوير او الافكار بس ده بيبقى طبيعي بتيجى فترة ملل 

المهم النهاردة واخيرا هنزل تجربتى مع مجموعة فيت مى (الفاونديشن والبودر والكونسيلر ) بقالى فترة بستخدمهم وحان الوقت للريفيو 

نبدأ بسم الله

فاونديشن فيت مى fit me matte poreless سعره 152 ج متوافر فى استاندات ميبلين 

الفاونديشن مخصص للبشرة العادية والمختلطة والدهنية ( انا بشرتى مختلطة )  قوامه شبه مائى خفيف الدرجة اللى عند اغمق منى بس بالنسبة ليا بحب استخدم الغامق والدرجة جاية على اصفر بيناسبنى الدرجات الصفرا بيندمج بسهولة وبينشف بسرعة مش بيكون مات زى ماهم كاتبين لكن سيمى مات فيه ريحة لكن خفيفة ومش قوية تغطيته خفيفة لمتوسطة تقدرى تحطى طبقتين منه مش بيكلكع شخصيا حبيبته جدا ويعتبر من مفضلاتى للسنة لانه خفيف ويناسب بشرتى كمان الحلو كانك مش حاطة حاجة يناسب اكتر البنات اللى معندهاش عيوب هتحبه جدا , كمان الحلو انه متوافر ب6 درجات فيناسب الاغلب , كمان مناسب للمبتدأين فى الميكب لسهولة دمجه

عيوبه : بيحتاج بودر بعد كام ساعة تقريبا 3 او 4 ساعات لوبشرتك دهنية جدا 

تغطيته خفيفة فمش هيناسب اللى عندها عيوب لكن بالنسبة ليا مناسب للغاية

مش ثابت مع الحر خالص ممكن مع بريمر وبودر يثبت لكن مش ثبات قوى

ملحوظة : مسببليش اى حبوب او مشاكل 

بودر فيت مىfit me matte poreless سعرها 142 ج متوافرة فى استاندات ميبلين

البودر ملمسها ناعم جدا انعم يمكن من بودر ريميل لونها جاى على اصفر فى منها غالبا 3 او 4 درجات مش بيتدى كفر خالص مجرد لون بسيط تنفع تحت العين مش بتخطط ولا بتكلكع تناسب غالبا البشرة العادية والمختلطة والدهنية بتطفى اللمعة لكن بعد كام ساعة ممكن يدهن حسب بشرتك برده حبيبتها لانها تناسب طبيعة بشرتى

عيوبها : مافيش تغطية

مش ثابته فى الحر 

كونسيلر فيت مى fit me concealer  سعره 127 ج متوافر فى استاندات ميبلين

الكونسيلر الاكثر شهرة فى دول الخليج بالخصوص ودايما اليوتيوبر والبلوجر بينصحوا بيه وكان نفسى ينزل عندنا واهو نزل 

الكونسيلر متوفر بدرجتين درجة 15 اللى معايا ودرجة اغمق

قوامه خفيف بيندمج بسهولة تغطيته من خفيفة الى متوسطة ثباته حلو جربته 4 ساعات وكان ثابت 

عيوبه : الدرجة فاتحة عليا تناسب البشرات البيضا مش الفاتحة لكن بستخدمها مع كونسيلر تانى وبيتضبط الى حد ما او كهايلايت 

لو لقيت الدرجة الاغمق ارجع اشتريه لكن الدرجة دى لا للاسف

وبس ..

هى دى تجربتى مع منتجات ميبلين وان شاء الله تكونوا استفادتوا ومتنسوش تعملوا فلو للانستجرام والبيدج لو مش عاملين 

لينك البيدج

everything for lady

لينك الانستجرام 

yasmen_blog

واسفة على التأخير مع السلامة