خطوات ازالة الشعر بالشيفينج (نصائح ومنتجات )

السلام عليكم ورحمة الله وبركاته

لاحول ولاقوة الا بالله العظيم

النهاردة حبيت اتكلم معاكوا من واحدة من طرق ازالة الشعر وهو الشيفينج (الحلاقة)

طبعا الطريقة منتشرة من زمان وانا شخصيا استخدمها بين فترة وفترة يعنى على حسب الاحتياج 
طيب نبدأ بتعريف الشيقينج :
عبارة عن طريقة تشيلى الشعر ولكن مش من الجذور فقط من على سطح البشرة وده السبب اللى بيخلى الشعر يطلع بسرعة وكل واحدة وعلى حسب طبيعة جسمها

النهاردة هتكلم عن طريقتى الخاصة فى الازالة والمنتجات اللى جربتها كمان وايه اللى فادنى وايه اللى لا 

دى كل الحاجات اللى بستخدمها شخصيا 

نبدأ بالماكينة وهى جيليت فينوس الوردية 

اشتريتها من السعودية قبل ماتنزل مصر كانت ب100 او 120 جنيه بقالها معايا 4 سنين تقريبا بيجى معاها راس زيادة كمان عشان تغيريها اما التانية تبوظ 
 الرأس ممكن تشتريها لوحدها موجودة فى الصيدليات 4 روؤس ب65 جنيه اعتقد دلوقتى غليت بس لو مش بتستخدمى الحلاقة كتير فهتقعد معاكى فترة كبيرة 
الرأس الواحدة ممكن تعمل كذا مرة اكتر من 5 مرات بشرط تنظيفها بعد كلل استخدام وتشليها فى مكان نظيف
طريقتى الشخصية فى الشيفينج:

اول خطوة التنظيف : لازم قبل الشيفينج الجسم او المنطقة اللى هتعمليها تكون نظيفة اما بستخدم شاور جيل عادى او شاور جيل طبى حاليا عندى سيتيال اتكلمت عنه  فى التدوينة اللى قبل دى
خطوة التنظيف مهمة جدا عشان الجسم يكون خالى من اى كريم او دهون عشان ميسببش حكة او حساسية او حبوب

ثانى خطوة التقشير: الخطوة دى مهمة لازالة الجلد الميت وتكون عملية الازالة سهلة فى ناس ممكن تسنخدم الطريقة قبل الازالة او بعد فجربى واختارى اللى يريحك مش بستخدم منتج معين للتقشير ممكن سكر+ زيت زيتون او قهوة + زيت زيتون او ملح الحليب كلهم كويسين 

ملحوظة مهمة : الخطوات السابقة مش بس بتقتصر على الشيفينج لكن ممكن قبل اى عملية ازالة الشعر تعمليها

ثالث خطوة الشيفينج: لازم استخدام زيت او فوم للازالة مينفعش تستخدمى الحلاقة على الناشف وان الماكنة تلمس الجسم وهو جاف غلط تماما 

شخصيا جربت زيت جوز الهند حلو بيخلى الازالة سهلة لكن مش بتشيل الشعر تماما جربتها كذا مرة مرتحتش
وزيت الزيتون برده جميل وسلس واحسن 
كمان جربت زيت جونسون جميل برده زى زيت الزيتون 
ممكن استخدام شامبو او شاور جيل بس الافضل الزيوت 
فى فوم للحلاقة متوافر فى صيدليات لكن مجربتوش
الحلاقة او الازالة فى العموم بتكون عكس اتجاه الشعر عشان الشعر اما ينمو يطلع على سطح البشرة مينموش تحت الجلد
اخر خطوة الترطيب:

 الترطيب مهم جدا بعد اى عملية ازالة لان الجلد بيكون حساس وبيحتاج ترطيب يفضل استخدام كريمات طبية او زيوت طبيعية

ملحوظة مهمة : لو بشرتك حساسة لو معرضة للحبوب والاحمرار استخدمى مضاد حيوى زى بيتاديرم او فاركوسين او فيدوسين اى مضاد حيوى تفضلى مرتين فى اليوم لمدة يومين واتجنبى العطور 
نصائح مهمة :

اوعى تجربى تستخدمى ماكينة الرجال لانها غير مخصصة لجلد النساء وكمان هتنشف الجلد وتطلع شعر تحت الجلد
 ممكن تكونى مبتفضليش الطريقة دى او متناسبكيش فمش معنى كده انها وحشة
مش بستخدم الطريقة دى الا وقت الحاجة او للمناطق الحساسة اعتمادى الاول للجسم على البراون لكن لو احتاجت بستخدمها 
تنظيف الماكينة مهمة بعد كل استخدام انا بحطها فى مياه وشاور جيل طبى زى ديتول او سيتيال او ممكن ديتول العادى 
بلاش للبشرة الوجه لانى شخصيا مجربتهاش ومنصحش بيها بس لو ليكى تجارب معاها قوليلنا فى التعليقات
 واخيييرا طرق ازالة الشعر كتير استخدمى اللى يعجبك وترتاحى له مش شرط الطريقة دى وطبعا احسن طريقة الليزر


facebook:everything for lady
instgram:yasmen_blog