مشترياتى الفترة الاخيرة وتجربتى معاهم

مساء الخير 

واحتشتونى وواحشنى التدوين لكن الفترة اللى فاتت مخى فاضى رغم انى مسجلة افكار بس كسل تقريبا

النهاردة حبيت اتكلم معاكوا عن منتجات كنت بستخدمها الفترة اللى فاتت ورأيى فيها 

نبدأ بسم الله

منتجات العناية بالشعر :

الفترة اللى فاتت غيرت روتين عنايتى بشعرى كاملا حتى الزيوت كمان ماعدا حمام الكريم لانى مرتاحة عليه 

 حاليا بستخدم مجموعة سترونج فيلا للشعر STRONG VILLE  هى مجموعة من انتاج شركة مصرية خالية من الكيماويات وغيره هتكلم عنها قريب جدااا بس النهاردة هتكلم عن الشامبو فقط

شامبو سترونج فيل سعره 65 ج متوافر فى الصيدليات الكبيرة

الشامبو كميته كبيرة بقاله معايا فترة  قوامه شفاف ريحته زيت ارجان جميلة ضغطتين 3 كفاية جدا مش بينشف الشعر مش بيطلع رغوة وده لانه خالى من سلفات الصوديوم شخصيا عجبنى وارجع اجيبه تانى خصوصا سعره مناسب 

ليف ان كونشينر من بايوبلس سعره 85 او 95 ج

من زمان كنت حابة اجربه كنت قريت عنه فى جروب كان سعره ساعتها 45 ج 

ريحته عطرية 
فكرته انك بتستخدميه على شعر مبلول بعد ماتغسليه مكتوب عليه مضاد للتساقط ملاحظتش النقطة دى لانى معنديش تساقط المفروض قبل الاستعمال بترجيه كويس عشان يتلخط وتستخدميه
رأيى فيه : ترطيبه ضغيف م قوى مأثرش على الهيشان اكبر ميزة اشوفها فيه انه بيخلى الشعر بيتسرح بسهولة كبيرة جداا 


منتجات العناية بالبشرة:

مرطب من ايف روشيه سعره 115 ج المرطب متوافر فى محلات ايف روشيه من جوجل تقدروا تعرفوا الفروع

المرطب عبوته انيقة زجاجية ريحته عطرية جدا وده يعتبر عيب للاسف قوامه قريب جدا من كريم لوريال هيدرا توتال 5 ولكن اتقل شوية بيحتاج تحطى كمية بسيطة من الكريم لانك لو كترتى بيدهن كتير 
الكريم مناسب للبشرة العادية والمختلطة اكتر بستخدمه بليل فقط لانه تقي اوى على استخدام فى النهار 

صن بلوك من بوباى سعره 85 ج متوافر فى الصيدليات

الصن بلوك ده انتشر بسرعة كبيرة جدا على النت لانه انتاج شركة مصرية وسعره ارخص من المستورد بكتيير
حجمه كبير جدا مكتوب عليه كمان انه وتر بروف فمناسب للبحر والعرق شخصيا فى الحر بحسه اختفى 
ريحته جوز هند تقريبا مكوناته كلها من الزيوت وفيتامين e
 الكريم قوامه كريمى خفيف جدا لما بحط منه مش بيدهن رغم انه محتواه زيوت بس لما اكتر منه بشرتى كلها بتدهنن ويتعرق رغم ان خدودى جافة فلازم استخدم نقطة بسيطة جدااا
اشوفه اختيار مناسب لاى حد عاوز صن بلوك سعره مناسب لكن مجربتوش فى المصيف والبحر 

مقشر الوجه من ستيقيز سعره 110 ج من سعودى ماركت
المقشر مشهور جدا 
فى منه انواع كتير انا اخدت ده
المقشر قوامه كريمى وفى حبيبات كبيرة تقشيره لطيف على البشرة ينفع يوميا افضل طريقة ليه على بشرة جافة تستخدميه حجمه كبير جدا فبيطول انا بقاله معايا اكتر من 4 شهور

غسول وقناع مقشر من غارنيه سعره 21 ج متوافر فى الصيدليات والسوبر ماركت فى منه حجم اكبر كمان
قوامه قريب من معجون الاسنان فى حبيبات صغيرة للتقشير ريحته نعناع وخيار قوية جربته فى التلات حالات عجبنى جداا بينظف البشرة ويقلل الدهون واللمعان مطلعليش حبوب شخصيا افضل مرة فى الاسبوع او اتنين لكن كغسول لا

وبس دى الحاجات اللى جربتها الفترة اللى فاتت واسفة على التأخير 
متنسوش تتابعونى على انستجرامى

yasmen_blog