ماسكاتى المفضلة ( طبيعية وجاهزة )
السلام عليكم ورحمة الله وبركاته
سبحان الله وبحمده سبحان الله العظيم
اخبار الصيام معاكوا ايه فى الحر واللى عندهم امتحانات ربنا يعينا وينولنا الاجر
التدوينة دى متأخخرة شوية كتبهاها فى الليستة من بدرى بس دلوقتى جيه معادها عن اغلب الماسكات اللى جربتها سواء طبيعية او جاهزة ورأيى فيها وتجربتى معاها
فى البداية للى معرفش انا بشرتى مختلطة عادية تميل للدهنية فى الصيف وتميل للعادية فى الشتا عشان اللى هيسألوا الماسك ده يناسب انهى بشرة بس
نبدأ بسم الله ,,
بالنسبة لروتين قبل الماسك اتكلمت عنه هنا
الماسكات الجاهزة
قناع النيم من هيمالايا سعره 33 ج او 40 تقريبا متوافر فى الصيدليات والسوبر ماركت :
اول ماسك جاهز اجربه الماسك مخصص للبشرة الدهنية والعادية كنت اتكلمت عنه فى تدوينة مفضلاتى فهتكلم عنه اختصار
قناع يتقشرغنى باللوز والخيار من هيمالايا سعره نفس القناع الاول متوافر فى الصيدليات والسوبر ماركت :
كتير محبوش الماسك لانه متوقعين نتيجة خيالية لكن الماسك ده فقط بيدى ترطيب وينعم البشرة ويشيل الشوائب هو عبارة عن سائل لزج ريحته غراء تفرديه على البشرة كمية بسيطة وبعدين تسبيه واما ينشفه تبدأى تقشريه
عن نفسى حبيته بس مش اوى مش اللى ارجع اشتريه تانى
الطمى المغربى من نفرتارى سعره85 جنيه متوافر فى كارفور المعادى وسيتى ستارز :
بقالى فترة اسمع عن الماركة دى هى ماركة مصرية عندها منتجات طبيعية ليهم موقع على جوجل لو حابين تعرفوا عن منتجاتهم وفروعهم اكتر
الطمى مكتوب عليه انه مناسب للجسم والشعر لكن انا جربته لبشرة الوجه
الماسك عبارة عن قطع طمى تاخدى كام قطعة وتحطى عليهم مياه ورد او مياه عادية اللى تحبيه واما يذوب افرديه على بشرتك لحد ماينشف تقريبا 20 دقيقة او اقل
الماسك فعلا يجنن بجد بينضف البشررة من الدهون والروؤس السودا (مع المداومة ) وبيخلى سطح الانف ناااعم كمان الطمى معروف بالتفتيح ملحظتش كده لانى بستعمله مرة كل اسبوعين
بحب استخدمه قبل المناسب عشان بيخفف الدهون واللمعان انصح بيه جدا جدا جداااا خصوصا لاصحاب البشرة الدهنية والمختلطة باقى البشرات لا وارجع اجيبه تانى وتالت
كده خلصت الماسكات الجاهزة اللى جربتها نيجى للماسكات الطبيعية
المكون الرئيسى اللى هيبقى معانا الزبادى
معروفة طبعا فوايد الزبادى انه مرطب كويس للبشرة حتى لو حطتيى طبقة لوحده على البشرة ويدى للبشرة نضارة
الماسك الاول
زبادى وباكيت شاى اخضر
من اكتر الماسكات اللى احبها جدااا ومع استمرارى عليه كل يومين اعمله مرة لاحظت ان بشرتى افتح
طريقته :
معلقة زبادى وباكيت شاى اخضر فضيه على الزبادى واخلطيهم وحطيهم على بشرة نظيفة جافة وسبيه لحد ماينشف تقريبا 20 دقيقة وبعدين تعملى صنفرة بالشاى الاخضر بحركات دائرية وبعدين تغسليه بمياه ساقعة ,, وبس كده
فوايد الماسك ترطيب وتفتيح ونضارة مع الاستمرار
الماسك التانى
معلقة زبادى ومعلقة قهوة
طريقته :
معلقة زبادى ونخلط معاه معلقة قهوة وحطيهم على بشرة نظيفة جافة وبس سبيه لحد ماينشف ونفس طريقة الماسك اللى فات فوايد الماسك ترطيب ونضارة وتفتيح وكمان القهوة تساعد على تقشير البشرة والتخلص من الاماكن الداكنة
الماسك التالت
معلقة لبن بودرة ومياه ورد او مياه متلجة
طريقته :
نخلط معلقة اللبن مع مياه الورد لحد مايتجانسوا وممكن تحطى لبن بدل مياه الورد وتحطيهم على بشرة جافة وتسبيه لحد ماينشف على بشرتك وتغسليه
فوايده توحيد لون ونضارة وترطيب
دول الماسكات اللى احبها حاليا واستخدمها دايما على حسب بشرتى تحتاج ايه وبس لو جربتوا حاجة من الماسكات دى قولولى وهستنى رأيكوا
تعليقات
إرسال تعليق