3 وجبات صحية ولذيذة بالشوفان
السلام عليكم ورحمة الله وبركاته
استغفر الله العلى العظيم
بما ان كتير بيسألونى عن طرق اكل الشوفان بطريقة صحية ومفيدة للدايت فحبيت اقولكوا انا باكله ازاى جربوها وهستنى رأيكوا
ده الشوفان اللى بستخدمه حاليا سعره 24 فى منه لونه ازرق وحبه كاملة بس من تجربيتى كله واحد فهاتى اللى تلاقيه
شوفان باللبن والفواكه والمكسرات :
اكتر طريقة شائعة وسهلة ومشبعة ولذيذة وسريعة
المكونات : 5 ملاعق شوفان حبة كاملة او متوسطة اللى تحبيه + نص كوباية لبن + الفواكه اللى تحبيها موز او فراولة او توت + مكسرات لو تحبى
الطريقة : حطى الشوفان على النار وقلبيه شوية وبعدين حطى اللبن وسبيه لحد ما يتقل ويغلى وضيفى معاه قرفة الفرفة بتدى طعم جميل للشوفان وبعدين حطيه فى طبق وعليه فاكهة وسكر بنى او عسل وكده جاهز للاكل
سموذى الشوفان والفواكه
بحب الطريقة دى جداا ولذيذة وتدى شعور بالسعادة
المكونات : 4 ملاعق شوفان + نص كوباية لبن + ربع كوباية مياه + موزة
الطريقة : حطى المكونات كلها فى الخلاط واضربيها كويس ومش هتحتاج لسكر
ممكن تحطى اى فاكهة بس الموز اكتر
بان كيك الشوفان
اخر طريقة ولذيذة جدااا هى البان كيك
المكونات : 4 ملاعق او 5 شوفان مطحونين + بيضة + رشة قرفة او كاكاو باودر + شوية لبن
الطريقة : اخلطى المكونات كويس جدا وبعدين هاتى طاسة وحطى زيت زيتون وحطيه شوية من الخليط على شكل دايرة واما يبدأ يستوى اقلبيه واما يخلص شليه وحطى شوية كمان لحد ما الخليط يخلص وبعدين حطيهم على بعد وحليهم بعسل او دارك شيكولات ومعاه فواكه اللى تحبيها
كل الوجبات دى تنفع للفطار او الغذا يفضل بلاش نشويات بليل
جربوها وادونى رأيكوا
الصور من انستجرامى Yasmen_blog
تعليقات
إرسال تعليق