منتجات ذى بودى شوب اللى جربتها ورأيى فيها
السلام عليكم ورحمة الله وبركاته
لا اله الا انت سبحانك انى كنت من الظالمين
موضوع اليوم عن منتجات ذى بودى شوب اللى جربتها ورأيى فيها
الشركة موجودة فى مصر فترة كبيرة حاولت اعرف بدأت من امتى بالضبط لكن ملقتش اجابة محددة بس غالبا من قبل 2011 ليه فروع فى اغلب المولات الكبيرة وليه فرع فى المعادى وفرع فو المهندسسين
البراند عندها منتجات عناية بالبشرة والشعر والجسم ولاين ميكب كمان وفرش ميكب وادوات استحمام وعطور
منتجاتهم تتميز بانها من مكونات طبيعية اسعار فى الدول الاخرى مناسب ويعتبر كويس لكن فى مصر اسعارهم عاليا خصوصا بعد زيادة الدولار
كل المنتجات اللى جبتها كان قبل الزيادة ماعدا منتجين هقولهم
نبدأ ,,
دى كل المنتجات اللى جربتها وعندى حاليا ماعدا منتج مش موجود بس هنزل صورة من النت
اولا منتجات البشرة :
غسول شجرة الشاى الفومينج سعره 160 ج
ريحته شوية مش حلوة لانه بشجرة الشاى بس مع الاستخدام تتعودى عليها , خفيف على البشرة رغوته غنية ضغطتين كفاية كميته تعتبر كبيرة يكفى استخدام شهرين او 3 شهور
ملحظتش اى تأثير على الحبوب
فرشاة الوجه سعرها حاليا 95 :
الفرشاة ليها غطاء عشان تحافظ عليها مقفولة لكن شخص ما رماها من عندى :(
الفرشاة شوية قاسية محتاجة ان يدك تكون خفيفة وانتى بتستخدميها
استخدمها بعد ازالة الميكاج عشان اتأكد ان البشرة نظيفة او فى روتينى الاسبوعى
مرطب البشرة بفيتامين e سعره 65 ج :
الحجم ده صغيرممكن تاخدوا للتجربة قبل ماتشتتروا الحجم الكبير
الكريم شوية عطرى مكتوب عليه انه مناسب لجميع اانواع البشرة ترطيبه خفيف ينفع قبل الميكب شخصيا حبيته وممكن ارجع اكرره تانى بس احسه مش مناسب للبشرة الجافة
الفيس ميست بفيتامين e كنت جيباه من السعودية ب 99 ريال من سنة
البخاخ ريحته زى ورد تقريبا الميست مكتوب عليه بيعمل ريفريش للبشرة وللترطيب لكن شخصيا محبتوش امتصاصة شوية بطئ بيلزق شوية مشفتش فايدة تشجعنى اشتريه تانى
ليب بالم بزيت الارجان ب95 جنيه :
عندى بقالها 7 شهور ولسه مخلصتش ترطيبها جميل واحسها بتدى فوليوم للشفايف انصح بيها جداااا خصوصا قبل النوم
ثانيا منتجات الشعر :
اكتر حاجة انصح بيه مشط الخشب عندى بقاله سنة وزيادة كنت جيباه من السعودية لكن سعره حاليا 95 ج
بيسهل تسريح الشعر سلس اعتمده من زمان واسنانه واسعة ومش بتجرح الفروة غير ان هيشان الشعر شوية قل بسبب انه بيمنع الكهربا اللى بتعملها الفرش البلاستيك
جوانتى التقشير سعره 95 :
جميل جدا تقشيره خفيف ومع اى مقشر يبقى قوى استخدمه كل شاور وحبتوه جدااا وكمان بيسهل انك توصلى للاماكن الصعبة
زبدةالجسم الاولى بجوز الهند كانت ب195 وكان فى تخفيض 110 من حوالى سنة ترطيبها كويس بس مش قوى ريحتها ثابته فى الهدوم لمدة يوم
التانية زبدة الجسم بزيت الارجان سعرها 90 او 95 جنيه ترطيبها احسن من الاولى بكتير وريحتها شوية ثابته فى الهدوم حبيتها اكتر بكتير من الاولى واكررها اكيييد
كريم الايد بزيت اللوزمش متوافر عندى حاليا لكن حبيته جدااا ترطيبه حلو ومناسب لاستعمال يومى وتأثيره على الاظافر جميل بيغذيها ويرطبهاا وده يساعدها انها تتطول
غيروا الباكيتج بتاع من فترة لكن مش لقياه صورة ليه
واخيرا الميكب
ليب جلوس من اخر مجموعة نزلت سعره 200 ج
حبيت اجيبه مكأفاة لنفسى واجربه سعره عالى شوية
ده سواتش للون
الروج بيقلب مات على الشفايف ثباته متوسط مش قوى خفيف على الشفايف مع محدد غامق يطلع جميييل
ومش بينشفها ابداا
وبس دى كل المنتجات اللى جربتها منهم وناوية على منتجات اكتر
تعليقات
إرسال تعليق