اخر المنتجات اللى جربتها

السلام عليكم ورحمة الله وبركاته ,,

لا اله الا الله سبحانك انى كنت من الظالمين ..

المنتجات اللى هتكلم عنها بستعملها من فترة فى بعضها حبيتوا والبعض لا واكيد ارجع اشتريه تانى 
نبدأ ,,

غسول فارميسس للبشرة المختلطة ,, سعره 104 او 114 جنيه متوافر فى الصيدليات 

الغسول فوم رغم انى مبحبش غسولات الفوم الا انه عجبنى جدا وناسب بشرتى جدااا لكن ملقتش تأثير على الحبوب عندى حباية بسيطة لكن مأثرش عليها ,, بالنسبة للدهون فى البشرة خففها بالنسبة ليا اللى حد ما وبشرتى مبتلمعش (طبيعة بشرتى مختلطة عادية صيف وشتا ) ضغطتين من الغسول كفاية جدااا يشبه الى حد ما غسول شجرة الشاى من ذى بودى شوب اكيد اكرره تانى .

مقشر الجسم من لونا body wash scrub سعره 21 جنيه من كارفور

دى تانى مرة اجرب ماركة لونا من المعروف انها ماركة مصريه عندها منتجات ميكب وبادى كير ولاين مناكير
جربت المناكير محبتوش خفيف جدا 
بالنسبة للصنفرة ريحتها فانليا وكوكنت حبيت ريحتها وحجمها حلو لكن تقشيرها ضعيف جدااا والريحة مش ثابتة نهائى لكن ممكن اضيف عليها ملح او ملح الحليب وتبقى احسن بالنسبة ليا مش هكررها تانى فى حاجات احسن بكتير وفى مقشرات ارخص ومتوافرة

بايو اويل عير متوافر فى مصر bio oil انا جبتوا من السعودية تحديدا النهدى سعره حوالى 30 ريال

استخدامى ليه مختلف تماما استخدمه على بشرة الوجه اخلط منه نقطتين مع مرطبى المعتاد (بيبانثين ) مبيدهنش البشرة خالص كمان استخدمه تحت العين لاحظت الخطوط  خفت (ملحوظة :الخطوط خفت لانى مكنتش تحت العين واما رطبت خفت الى حد ما )
مجربتوش على الجسم الى النهاردة لكن عجبنى للبشرة مشفتش مشاكل باختصار بيرطب ومبيدهننش معتقدش اشتريه تانى لانه مش عندنا

لوشن الجسم من نفيا ب فيتامين e وخلاصة التوت سعره 40 جنيه او 44 متوافر فى السوبر ماركت والصيدليات

اللوشن ريحته حلوة خفيفة مش ثابتة , قوامه مائى حجمه صغير جدا على سعره خلص من 6 استخدامات تقريبا (استخدمه بعد الشاور على كامل الجسم )

ترطيبه مناسب للصيف اكتر وللبشرة العادية تحديدا ترطيبه ضعيف للاماكن الجافة بالنسبة للتفتيح ملاحظتش فرق خالص معاه مش هكرره تانى لكن هجرب الانواع التانية

ماسكرا الحواجب brow drama من مايبيلين سعرها 89 جنيه متوفرة فى ستاندات مايبلين 
الدرجة اللى عندى dark brown تناسب شعر لحواجب الاسود والبنى , شعر حواجبى متوسط الكثافة لكن فيه بعض الفراغات فى نهايته حبيبت اجربها كتغيير لون الحواجب لكن مغيرتش لون حواجبى تماما لان اللون غامق جدااا لكن بتملى الفرغات وثابتة جداااا جربتها يوم كامل لقيتها لسه موجودة على الحواجب ازالتها سهلة جداا بالمزيل عادى تناسب كمان الحواجب الخفيفة بتديهم لوك طبيعى اكتر مش هكررها تانى لانى حابة اجرب منتجات اكتر

ده شكل فرشتها من جوا بتحطى السائل اللى بالطرف على الحواجب وتمشطى بفرشاة الماسكرا نفسها .

كريم الايد من كيو فى سعره 94 متوافر فى الصيدليات 

من المعروف ان مرطبات جيدة للبشرة الجافة غير انها طبية حبيت اجرب كريم الايد خلال فترة الشتا , انا ايدى مش جافة جدا تعتير عادية 
الكريم طبى مالوش ريحة نهائى وده بيخلى مناسب للبشرة الحساسة او انك تحطيه وتخرجى للشمس لان العطور بتتفاعل مع الشمس وتغمق البشرة , مش بيسيب احساس دهنى على البشرة نهائى ولا بيحسسك بملمس الكريم على الايد ترطيبه جميل جدا لكن مع الاستمرار والمواضبة عليه يعنى مش من اول مرة ممكن تلاحظى فرق فى ملمس البشرة يناسب ترطيب خلال اليوم جدا وانصح بيه لو فى مقدرتك تجبيه , ممكن اكرره بس حابة اجرب منتجات تانية


وبس خلصت المنتجات اللى هتكلم عنها النهاردة 
قولولى جربتوا منتج منهم وقولولى تجربتكم معاه 


facebook:everything for lady

instgram:yasmen_blog