مفضلاتى لعام 2016 My favorites for 2016

فبراير 13, 2017

السلام عليكم ورحمة الله وبركاته

حبيت النهاردة اتكلم عن المفضلات من منتجات العناية بالشعراللى جربتها فى 2016 والجسم مش هتكلم عن الميكب لانى حاليا بجرب منتجات جديدة وحابة اكون رأى كويس فهتبقى لوحدها بعدين ان شاء الله

نبدأ بمنتجات الشعر :

تقريبا 3 منتجات اتكلمت عنهم قبل كده هنا بس باختصار هما اكتر منتجات حبتها واجيبها دايما

منتجات العناية :

غسول سيتيال سعره تقريبا 12 جنيه او اقل

احبه جدا جدا جدا احيانا بيتقطع وبيرجع تانى استخداماتى له كالاتى :

استخدمه للاندر ارم لانه مش بينشفها نهائى وكمان بينظف

للمنطقة الحساسة كمان حللو بس مرة كل اسبوع غطا واحد على لتر مياه ومافيش مشاكل الحمد لله

استخدمه قبل الشيفينج كشاور جيل مطهر مجربتش غيره بس هو توب بالنسبة ليا

كريم مرطب من بيبانثين سعره36 جنيه

رابع مرة اجيبه ترطيبه جميل مش بيدهنن ابدا ولا بيطلع حبوب ومن غير ريحة غير انه طبى سمعت كتير انه بديل لكريم كلينيك بس مجربتوش عيبه الوحيد انه ناقص فى السوق المصرى

زيت جونسون للاطفال سعره 20 جنيه
دايمااتكلم عنه على الانستجرام والفيس بوك ترطيبه حلو جدا للجسم بديل لاى لوشن بعد الشاور حتى للاماكن الجافة جميل عيبه ان كتير بيخافوا من شركة جونسون بس استعمله من 7 سنين تقريبا ومعانتش من مشاكل او اسمرار

مزيل المناكير من يولو سعره 20 جنيه

تانى مرة اجيبه من مكوناته اسيتون لكن فيه فيتامين وزيت الخروع لكن الاسيتون اكبر نسبة هو

للامانة كسرش ظوافرى الحمد لله بعتمده دايما

مزيل العرق من دوف اعتقد سعره فى 20
حبيته اكتر من ليدى سبيد ستيك لانه كريمى اكتر مش بيخص بسرعة تأثيره بيقعد 48 ساعة فحلو للسفر واليوم الطويل وريحته هادية ابدا مافيهاش خيارلكن مبقتش الاقيه خالص وبقيت الاقى العادى بس انا حبيبت الستيك اكتر

شاور جيل من بالماويلف palmolive سعره 25 جنيه تقريبا

الشاور جميل جبته 5 مرات تقريبا ترطيبه حلو لو محتيش لوشن بعديه جسمك مش هينشف ابدا وكمان كريمى ورغوته حلوة

قناع التنقية بالنيم من هيمالايا سعره 30 تقريبا

الماسك حلو جدا قبل اى مناسبة ينشف الدهون اللى فى البشرة وينظم افرازات الدهون لكن تأثيره يومين بالكتير وكمان لاحظت انه بيقلل التعرق شوية

محلول العدسات اوبتى فرى سعره 84 جنيه
مش فاكرة السعر لانه احجام مختلفة بيريح العين عكس رينو وكمان مش بيخلى العين تدمع يارتنى اعرفه من زمان

فرشاة الوجه من ذى بودى شوب سعرها 60 او 90
كل ما احط ميكب استعملها جميلة بجد تنظف البشرة جداا هى ناعمة بس مش اوى مش بفضلها يوميا

زبدة الشفايف من ذى بودى شوب بزيت الارجان سعرها 65
ترطيبها قوى للشفايف بس تقيل حلو لبليل اكتر وحجمه حلو عندى بقالوا شهور ومخلصش

جوانتى التقشير من ذى بودى شوب سعره 65 او 90
استخدمها مع كل شاور بتقشر تقشير خفيف ومع اى مقشرتزيد من فعاليته
من ساعة ما اشتريتها مستخدمتش الليفة العادية

واخر حاجة زبدة الكاكاو من بالمرز معرفش سعرها من زمان

ترطيبها تقيل ممكن يفضل 4 ايام بجد جميل استخدمه للجسم كامل بس للاسف مبقتش موجودة هى تقيلة بس انا احب المرطبات التقيلة فى ناس مش بتحب احساسهم على الجسم وكمان بتخلى ريحة الجسم كاكاو

كريم جليسوليد سعره على حسب الحجم من 5 ل 15
الشكل ده متوافر بس فى السعودية
ترطيبه تقيل فيفضل قبل النوم وبيفتح الايد لانه من مكوناته الجلسرين وكمان مع الوقت بيفتح الركب والكوع من مفضلاتى من زمان

وبس كده خلصت المفضلات وده اللى عجبنى خلال السنة وبس

Facebook :everything for lady

instgram :yasmen_blog