روتينى الحالى للعناية بالشعر / My current routine for hair care

مساء الخير
أول تدوينة اكتبها عن الشعر 

طبعا انا زيى زى بنات كتير بنجرب حاجات كتير للشعر لحد مابنلاقى اللى نرتاح عليه وللاسف انا شعرى حاليا نادر اما حاجة تمشى معاه فبحتاج اغير دايما عشان اشوف احسن نتيجة

 المهم دى المنتجات الللى استخدمها حاليا لشعرى 

 نبدأ بالشامبوهات:



شامبو بايوبلس الحجم الصغير سعره كان 44 جنيه

مبدأيا شعرى نوعه جاف جدااا .. والشامبو مخصص للشعر الجاف يعنى يناسبنى

 الشامبو بالعسل مخصص لتساقط الشعر , لونه زى العسل وقوامه خفيف ,انا مش بعانى لتساقط الحمد لله فملحظتش مفعول للنقطة دى 

بقالى فترة بسيطة بس على العموم مش بينشف الشعر رغوته بسيطة لانه طبى وخالى من سلفات الصوديوم 

شخصيا عجبنى واكرره اكيد ..

استخدمت قبله شامبو للقشرة من سيباميد عندى بقاله سنة سعره كان145 جنيه 

قوامه تقيل لونه مايل اللى الشفاف ريحته دوا بس مش مزعجة , الشامبو مخصص للشعر الدهنى فكان بينشف الشعرجدااا وقصف الاطراف لكن مفعوله للقشرة جيد جدااا وبيخلص منها

كنت ببدل بين سيباميد وبين شامبو كارتيه من لوفيا سعره اعتقد 50 مش فاكرة السعر بالضبط

الشامبو تجارى لكن خالى من السلفات قوامه سايل اخف من الشامبو ولونه اصفر وريحته زبدة شيا .. الشامبو حلو لكن مش واااو بس مش بينشف الشعر وحجمه كبير جدااا .. 

بالنسبة لحمام الكريم او البلسم

احب بلسم جونسون للاطفال تقريبا احلى بلسم استخدمته لكن مش عندى حاليا

حمام الكريم من لوفيا نفس مجموعة الشامبو اللى فوق سعره 89 قبل الزيادة 

قوامه زى الكريم لونه اصفر وبريحة زبدة شيا ترطيبه معقول للشعر الجاف اما لو شعرك عادى هيناسبك انا بضيف ليه اى زيت بيضاعف ترطيبه

واحلى حمام كريم بالنسبة ليا هو بانويل مش فاكرة سعر لكن رخيص

ترطيبه حلو جدا لكن بنات كتير قالولى انه بيوقع الشعر مع انى مش بستعمله على الفروة لكن خوفت بس هرجع استعمله تانى لانى بحب ترطيبه

الزيت المفضل ليا قبل الشاور هو باراشوت جولد بجوز الهند

اشتريته من السعودية لكن نزل عندنا فى مصر اخيرررا او كان موجود وانا معرفش

برغم ان جوز الهند الطبيعى مش بيعمل نتيجة معايا بس ده جميل بيرطب شعرى وكمان بحطه معا الماسكات ارجع اشتريه دايما 

بعد الشاور تيجى خطوة تسريح الشعر 

افضل حاجة هى مشط ذى بودى شوب احسن من الفرشاة كمان مش بيعمل كهرباة للشعر ويقصفه

نتجى للترطيب :
تونيك فازلين معرفش سعره بالمصرى

تانى مرة اجيبه احبه واحب ترطيبه بيدى لمعة للشعر وريحته فازلين موجود فى مصر بس سعره غالى شويه بس حلو نقطتين كفاية جدا 

قبل المكواة طبعا لازم سيروم عشان يحمى الشعر بستخدم حاليا سيروم ايفرى ستراند

بيدى لمعة حلوة وينفع كمان بعد ماترطبى شعرك نقطة بسيطة منه تكفى عندى بقاله سنة تقريبا عندى سعره حاليا 140

وبس دى كل المنتجات الى استخدمها لشعرى بالتفصيل انهى منتجات جربتوها منهم ورأيكوا فيها

Instgram:ladyyasmen
Facebook:everything for lady